Amorebieta-Etxanoko Baseliza eta Elizetako ganbera-musikaren Eleizetan programaren IX edizioari amaiera eman zion, joan den larunbatean, Pavel Hula zuzendari duen eta hamabi musikari txekiarrek osatuta dagoen Camerata Praga taldearen emanaldiak.

Amaitu berri dugun bederatzigarren edizio honetan aukeratutako sei erlijio-eraikinak (Boroako eta Dudeako baseleizak, eta  Etxanoko, Bernagoitiko, Larreako eta Andra Marielizak) ganbera-musikaz gozatzeko irrikan etorritako jendeaz bete dira. Guztira, 1000tik gora izan dira kalitate bikaineko eta  barietate handiko proposamenei erantzun dietenak. Esan beharra dago urterik urtera finkatuz doala ekimen hau, eta Amorebieta-Etxanoko eta Durangaldeko zaletuentzat erreferentzia bilakatu dela.

AMETX erakunde autonomoak eta Amorebieta-Etxanoko kultura eta euskara zinegotzigoak eskerrak eman nahi ditu, ikasleen interesa bereziki nabarmenduz, eta jakinarazi digutenez, hasita daude dagoeneko datorren urtean X. urteurrena ospatzeko egingo den edizio berezia prestatzen.